Når gjeldsbrevet / stipendmeldinga er blitt annullert, får du ikkje utbetalt støtta frå Lånekassen. Les her kva du må gjere for å få utbetalt pengane.
Annulleringa skjer fordi Lånekassen ikkje har motteke
- underteikna gjeldsbrev / stipendmelding frå deg innan fristen (står til høgre oppe på gjeldsbrevet), eller
- stadfesting frå lærestaden på at du har opptak ved den utdanninga du har fått støtte til, eller
- stadfesting frå deg på ein konto som du sjølv eig
Korleis få pengane?
Når du har motteke brev eller e-post om annullering, er det for seint å sende inn det opphavlege gjeldsbrevet / stipendmeldinga. For å få betalt ut støtta treng du eit nytt gjeldsbrev/stipendmelding.
Under ser du kva du må gjere for å få nytt gjeldsbrev / stipendmelding sendt til deg. Merk at det kan ta ei dryg veke frå du eller lærestaden sender inn det som er naudsynt, til det er registrert inn hos Lånekassen og pengane kjem på konto.
Du må seie frå innan fristen for å få pengane
Du må sende e-post, ringe, eller sende inn brev og eventuelt registrere kontonummer innan tre veker frå du mottok brevet om annullering. Dersom skoleåret/utdanninga er avslutta, kan du ikkje få betalt ut pengane.